عفت ايدي اعلة شعرك مالكيت الايد
طبت بالظلام وتاهت بشعرك
نهر حسنك عذب واوصافي كطرة
طبعآ من اوصفك اغرك بنهرك
ياكصبة شكر بشفافك الحلوات
حلكي كلاص حنظل ينتظر شكرك
ــــــــــــــــــــــــــــــــــــــــــــــ
خليتك حلم وعيوني ترسم بيك
وغير عيوني ما واحد يرسمك
نادوني اشكثر بأسمي وجنت ناسيه
وكلتلهم نعم من صاحو اسمك
ـــــــــــــــــــــــــــــــــــــــــــــــ
حبيبي العمر يركض ما يتاني
وانة العطشان منك ما يتاني
تعال اليوم باجر ميت آني
ولو بآخر نفس تلحك علية
ـــــــــــــــــــــــــــــــــــــــــــــــ
ادور اعليك يمدلل ولك هاي
ابسبب شوكي يتل بية ولك هاي
اجروح افراكك ابكلبي ولك هاي
تعال وعالج العلة الخفية
ــــــــــــــــــــــــــــــــــــــــــــــــــ
انة من هام بودادك وأجنبيك
نهاري ليل من فركك وجنبيك
بغيابك راحن افراحي واجن بيك
يمن شوفتك عيد ايصير الية
ــــــــــــــــــــــــــــــــــــــــــــــــــ ـ
اشكثر سامع قصص بالحب وقاري
وغرامك ثبت براسي وقاري
ملة اصبحت بفراكك وقاري
ادك والطم هواك اشعمل بية
ـــــــــــــــــــــــــــــــــــــــــــــــــ
عيونك من شفتهن .. شتمني
وعقلي جان ثابت .. شتة مني
هجم بيتج يروحي .. واشتمني ؟
تمنيت الحلو يصعب علية .
ــــــــــــــــــــــــــــــــــــــــــــــــــ
جمر حبك يمحبوبي .. دفاني
وبيدك جنت بأفراحك .. دف آني
من اموتن لو تصير انتة .. دفاني
اردن عدل وابرة من المنية
ـــــــــــــــــــــــــــــــــــــــــــــــــ
اجيتك حرت ادك الباب يولة
غريب وبالغريب الوكت يولة
لعب بية الزمان اشلون يولة
دخيلك لا تصير وياه علية
ــــــــــــــــــــــــــــــــــــــــــــــ
بجيت وسال دمع العين بالدار
على خلن هجري وخان بلدار
امر للدار مالي هوة بلدار
هواية ابساكنين الدار هية
ـــــــــــــــــــــــــــــــــــــــــــــــ
شيب راسي وعظمي وهنلي
وليالي الكدر صرتلهن وهنلي
بعد مشروب مالذلي وهنلي
انة ميت ترة او لانفس بية
ـــــــــــــــــــــــــــــــــــــــــــــــــ
الف يا وسفة حبكم .. شلنة بيهة
كثيرة جروح منكم .. شلنة بيهة
اهل ذات الردية .. شلنة بيهة
لوتعلك العشرة شمع هية هية
ـــــــــــــــــــــــــــــــــــــــــــــــــ
جفوفي مكطعة بلحظك .. اجر من
بحبك بعد ما احصل .. اجر من
الصلى وصام ما حصل .. اجر من
من يحيي العاشك بوكت المنية
ــــــــــــــــــــــــــــــــــــــــــــــــــ ــــ


ارجو قد نالت اعجابكم هذه الابيات من الابوذية والبطاقات
تقبلو اجمل تحية حب ووفاء مني اليكم
صديقكم وزميلكم الدائم

يطير وياك اخذ مرسال وصله
وخبره الروح بس تريد وصله
اخذ وياك من الكلب وصله
بلكي يشوفها ويرجع اليه

الف شكر اخي على هذه الابوذيات الروعه ونتمنه منكم المزيد ....مع تحياتك اختك العربيه